shikwa nahin gila nahin rabt koi baham nahin

shikva nahīñ gila nahīñ rabt koī baham nahīñ

rasm-e-salām kyā jahāñ pursish-e-hāl-e-ġham nahīñ

go ki nahīñ nigāh meñ dil se nahīñ ho duur tum

dīda-e-dil ke vāste fāsla besh-o-kam nahīñ

bazm se aap kyā ga.e raunaq-e-bazm le ga.e

ab vo surūr-e-dil kahāñ aap ga.e to ham nahīñ

aap kī yaad aa ga.ī dil pe ḳhushī sī chhā ga.ī

ab mujhe ġham se vāsta ab mujhe koī ġham nahīñ

pahlā sā vo karam kahāñ lutf kī vo nazar kahāñ

hai ye sitam kī intihā koī nayā sitam nahīñ

us kī nigāh-e-mast kā ab bhī ḳhumār hai magar

sāqī-e-dil-navāz kā pahlā sā vo karam nahīñ

dāman idhar hai taar taar ruḳh pe nahīñ udhar naqāb

'ishq agar hai be-vaqār husn kā bhī bharam nahīñ

manzil-e-zindagī na pūchh sirf safar hai zindagī

paañv uThā qadam baḌhā hosh sañbhāl tham nahīñ

dekh kar un ke iltifāt rah ga.ī dil kī dil meñ baat

hosh gayā jo vo ga.e aa.e to dam meñ dam nahīñ

minnateñ shaiḳh-o-barhaman kījiye kis liye 'habīb'

dil hai mirī nigāh meñ dair nahīñ haram nahīñ

shikwa nahin gila nahin rabt koi baham nahin

rasm-e-salam kya jahan pursish-e-haal-e-gham nahin

go ki nahin nigah mein dil se nahin ho dur tum

dida-e-dil ke waste fasla besh-o-kam nahin

bazm se aap kya gae raunaq-e-bazm le gae

ab wo surur-e-dil kahan aap gae to hum nahin

aap ki yaad aa gai dil pe KHushi si chha gai

ab mujhe gham se wasta ab mujhe koi gham nahin

pahla sa wo karam kahan lutf ki wo nazar kahan

hai ye sitam ki intiha koi naya sitam nahin

us ki nigah-e-mast ka ab bhi KHumar hai magar

saqi-e-dil-nawaz ka pahla sa wo karam nahin

daman idhar hai tar tar ruKH pe nahin udhar naqab

'ishq agar hai be-waqar husn ka bhi bharam nahin

manzil-e-zindagi na puchh sirf safar hai zindagi

panw uTha qadam baDha hosh sanbhaal tham nahin

dekh kar un ke iltifat rah gai dil ki dil mein baat

hosh gaya jo wo gae aae to dam mein dam nahin

minnaten shaiKH-o-barhaman kijiye kis liye 'habib'

dil hai meri nigah mein dair nahin haram nahin