shikwe ki baat hai na shikayat ki baat hai

shikve kī baat hai na shikāyat kī baat hai

aapas kī guftugū hai mohabbat kī baat hai

īsār chāhtī hai mohabbat ba-nām-e-tark

ab imtihān-e-zarf hai himmat kī baat hai

but-ḳhāne meñ bhī nūr-e-ḳhudā dekhtā huuñ meñ

jī haañ ye mere husn-e-aqīdat kī baat hai

kyuuñ dūsroñ kī ziist se letā nahīñ sabaq

jo baat aadmī kī hai hairat kī baat hai

jo tujh ko nā-pasand hai auroñ ko hai pasand

ye apne apne zauq-o-tabī.at kī baat hai

suniye to shaiḳh jī kī zarā lan-tarāniyāñ

hūroñ kā zikr-e-ḳhair hai jannat kī baat hai

shaiḳh-e-haram kā zikr nahīñ hai mire nadīm

pīr-e-muġhāñ ke kashf-o-karāmat kī baat hai

sīrat hī jab nahīñ hai to sūrat kā zikr kyā

sūrat kā kyā savāl hai sīrat kī baat hai

tū aur bad-gumān ho kahne se ġhair ke

shikve kā hai maqām shikāyat kī baat hai

mujh se qarīb ho ke bahut duur ho ga.e

ye bhī mirā nasīb hai qismat kī baat hai

ye shā.irī ye aap kā zauq-e-mutāla

fursat kā mashġhala hai farāġhat kī baat hai

maiñ be-adab nahīñ huuñ raheñ aap mutma.in

ḳhalvat hī meñ kahūñgā jo ḳhalvat kī baat hai

aġhyār ko bhī itnā to āḳhir hai e'tirāf

'tālib' kī baat baat sadāqat kī baat hai

shikwe ki baat hai na shikayat ki baat hai

aapas ki guftugu hai mohabbat ki baat hai

isar chahti hai mohabbat ba-nam-e-tark

ab imtihan-e-zarf hai himmat ki baat hai

but-KHane mein bhi nur-e-KHuda dekhta hun mein

ji han ye mere husn-e-aqidat ki baat hai

kyun dusron ki zist se leta nahin sabaq

jo baat aadmi ki hai hairat ki baat hai

jo tujh ko na-pasand hai auron ko hai pasand

ye apne apne zauq-o-tabiat ki baat hai

suniye to shaiKH ji ki zara lan-taraniyan

huron ka zikr-e-KHair hai jannat ki baat hai

shaiKH-e-haram ka zikr nahin hai mere nadim

pir-e-mughan ke kashf-o-karamat ki baat hai

sirat hi jab nahin hai to surat ka zikr kya

surat ka kya sawal hai sirat ki baat hai

tu aur bad-guman ho kahne se ghair ke

shikwe ka hai maqam shikayat ki baat hai

mujh se qarib ho ke bahut dur ho gae

ye bhi mera nasib hai qismat ki baat hai

ye shairi ye aap ka zauq-e-mutala

fursat ka mashghala hai faraghat ki baat hai

main be-adab nahin hun rahen aap mutmain

KHalwat hi mein kahunga jo KHalwat ki baat hai

aghyar ko bhi itna to aaKHir hai e'tiraf

'talib' ki baat baat sadaqat ki baat hai