shikwon pe sitam aahon pe jafa sau bar hui sau bar hua

shikvoñ pe sitam aahoñ pe jafā sau baar huī sau baar huā

har baat mujhe har kaam mujhe dushvār huī dushvār huā

saaqī kī nashīlī ā.ankhoñ se saarī duniyā saarā aalam

badmast huī badmast huā sarshār huī sarshār huā

hai naam dil-e-muztar jis kā kahte haiñ jise sab jān-e-hazīñ

marne ke liye miTne ke liye tayyār huī tayyār huā

iz.hār-e-mohabbat bhī hai ġhazab iz.hār-e-mohabbat kaun kare

hujjat un se jhagḌā mujh se har baar huī har baar huā

duniyā meñ bahār ab aa pahuñchī mai-ḳhāne kā dar bhī khul jaa.e

ek ek galī ek ek makāñ gulzār huī gulzār huā

kyuuñ rahm vo zālim karne lagā kyuuñ maut yahāñ tak aane lagī

ulfat se mirī sūrat se mirī bezār huī bezār huā

hasrat apnī armāñ apnā āzār apnā taklīf apnī

hamdard banī hamdard banā ġham-ḳhvār huī ġham-ḳhvār huā

milne se tanaffur thā jis ko āġhosh meñ ab vo sotā hai

taqdīr mirī iqbāl mirā bedār huī bedār huā

maqtal meñ jafā.eñ Dhāne par maqtal meñ jafā.eñ sahne par

qātil kī nazar bismil kā jigar tayyār huī tayyār huā

ai 'nūh' ye kyā sūjhī tum ko tūfān uThāyā kyuuñ tum ne

saarī duniyā saarā aalam bezār huī bezār huā

shikwon pe sitam aahon pe jafa sau bar hui sau bar hua

har baat mujhe har kaam mujhe dushwar hui dushwar hua

saqi ki nashili aaankhon se sari duniya sara aalam

badmast hui badmast hua sarshaar hui sarshaar hua

hai nam dil-e-muztar jis ka kahte hain jise sab jaan-e-hazin

marne ke liye miTne ke liye tayyar hui tayyar hua

izhaar-e-mohabbat bhi hai ghazab izhaar-e-mohabbat kaun kare

hujjat un se jhagDa mujh se har bar hui har bar hua

duniya mein bahaar ab aa pahunchi mai-KHane ka dar bhi khul jae

ek ek gali ek ek makan gulzar hui gulzar hua

kyun rahm wo zalim karne laga kyun maut yahan tak aane lagi

ulfat se meri surat se meri bezar hui bezar hua

hasrat apni arman apna aazar apna taklif apni

hamdard bani hamdard bana gham-KHwar hui gham-KHwar hua

milne se tanaffur tha jis ko aaghosh mein ab wo sota hai

taqdir meri iqbaal mera bedar hui bedar hua

maqtal mein jafaen Dhane par maqtal mein jafaen sahne par

qatil ki nazar bismil ka jigar tayyar hui tayyar hua

ai 'nuh' ye kya sujhi tum ko tufan uThaya kyun tum ne

sari duniya sara aalam bezar hui bezar hua