شعلہ بکف ساعتوں کی سرخی نظر آ رہی ہے

شعلہ بکف ساعتوں کی سرخی نظر آ رہی ہے

ظلمت گزیدہ نگاہیں خوش ہیں سحر آ رہی ہے

دریا کے طوفانی دھارے غرقاب ہوتے کنارے

موج نفس ساتھ لے کر کیا کیا بھنور آ رہی ہے

راہوں میں دیوار اٹھاتی پلکوں پہ کانٹے سجاتی

سو سو ہنر آزماتی تنہائی گھر آ رہی ہے

خود آگہی کی یہ جرأت انگلی اٹھائے جنوں پر

شوریدہ سر کے مقابل زنجیر در آ رہی ہے

افلاک کی بیکرانی سودائے سر کی زبانی

پرواز کی لہر دل میں بے بال و پر آ رہی ہے

شاخوں پہ گل پھر کھلیں گے بچھڑے ہوئے پھر ملیں گے

محور پہ اپنے یہ دنیا پھر لوٹ کر آ رہی ہے