shola-ba-kaf saaton ki surKHi nazar aa rahi hai

sho'la-ba-kaf sā'atoñ kī surḳhī nazar aa rahī hai

zulmat-gazīda nigāheñ ḳhush haiñ sahar aa rahī hai

dariyā ke tūfānī dhāre ġharqāb hote kināre

mauj-e-nafas saath le kar kyā kyā bhañvar aa rahī hai

rāhoñ meñ dīvār uThātī palkoñ pe kāñTe sajātī

sau sau hunar āzmātī tanhā.ī ghar aa rahī hai

ḳhud-āgahī kī ye jur.at uñglī uThā.e junūñ par

shorīda-sar ke muqābil zanjīr-e-dar aa rahī hai

aflāk kī be-karānī saudā-e-sar kī zabānī

parvāz kī lahr dil meñ be-bāl-o-par aa rahī hai

shāḳhoñ pe gul phir khileñge bichhḌe hue phir mileñge

mehvar pe apne ye duniyā phir lauT kar aa rahī hai

sho'la-ba-kaf sa'aton ki surKHi nazar aa rahi hai

zulmat-gazida nigahen KHush hain sahar aa rahi hai

dariya ke tufani dhaare gharqab hote kinare

mauj-e-nafas sath le kar kya kya bhanwar aa rahi hai

rahon mein diwar uThati palkon pe kanTe sajati

sau sau hunar aazmati tanhai ghar aa rahi hai

KHud-agahi ki ye jurat ungli uThae junun par

shorida-sar ke muqabil zanjir-e-dar aa rahi hai

aflak ki be-karani sauda-e-sar ki zabani

parwaz ki lahr dil mein be-baal-o-par aa rahi hai

shaKHon pe gul phir khilenge bichhDe hue phir milenge

mehwar pe apne ye duniya phir lauT kar aa rahi hai