sho’la-e-dard liye dida-e-tar mein aae

sho’la-e-dard liye dīda-e-tar meñ aa.e

chārāgar aag lagāne mire ghar meñ aa.e

chand tinke hī sahī apne nasheman kī bisāt

kuchh to haiñ jo nigah-e-barq-o-sharar meñ aa.e

ab jo phirte haiñ sukūñ DhūñDte maqtal maqtal

tujh se bhāge to tire dām-e-asar meñ aa.e

koī darvāza na rauzan na darīcha koī

raushnī aa.e to kis raah se ghar meñ aa.e

un ko manzil hī nahīñ 'azmat-e-manzil bhī milī

le ke jo tosha-e-jāñ rāhguzar meñ aa.e

zaḳhm-e-dil mahke to un ko na milī daad koī

phuul mahke to zamāne kī nazar meñ aa.e

ho tire fan meñ 'azīz' us ke suḳhan kī ḳhushbū

rang us kā tire andāz-e-hunar meñ aa.e

sho’la-e-dard liye dida-e-tar mein aae

chaaragar aag lagane mere ghar mein aae

chand tinke hi sahi apne nasheman ki bisat

kuchh to hain jo nigah-e-barq-o-sharar mein aae

ab jo phirte hain sukun DhunDte maqtal maqtal

tujh se bhage to tere dam-e-asar mein aae

koi darwaza na rauzan na daricha koi

raushni aae to kis rah se ghar mein aae

un ko manzil hi nahin 'azmat-e-manzil bhi mili

le ke jo tosha-e-jaan rahguzar mein aae

zaKHm-e-dil mahke to un ko na mili dad koi

phul mahke to zamane ki nazar mein aae

ho tere fan mein 'aziz' us ke suKHan ki KHushbu

rang us ka tere andaz-e-hunar mein aae