شعلہ زاروں سے کبھی آب رواں سے گزرے

شعلہ زاروں سے کبھی آب رواں سے گزرے

ہم تری راہ میں ہر سود و زیاں سے گزرے

فصل گل سے تری اے دوست ہیں محروم ہنوز

ہم ابھی تک ہیں اسی دور خزاں سے گزرے

ان کے قدموں کے نشاں دیکھ لے تو بھی آ کر

تیرے دیوانے ابھی بزم جہاں سے گزرے

حال کچھ کہنے کو پہنچے تھے ہم ان کے در پر

زخم سینے میں لئے ان کے یہاں سے گزرے

گھر جلا مال لٹا خون بہا جان گئی

ہم ترے دور میں کب امن و اماں سے گزرے

ہائے وہ عہد گزشتہ کے سنہرے ایام

یوں گئے جیسے کوئی تیر کماں سے گزرے

موت پر میری عزیزوں کو ذکیؔ کیوں غم ہے

کون ایسا ہے جو اک دن نہ یہاں سے گزرے