shola-zaron se kabhi aab-e-rawan se guzre

sho'la-zāroñ se kabhī āb-e-ravāñ se guzre

ham tirī raah meñ har sūd-o-ziyāñ se guzre

fasl-e-gul se tirī ai dost haiñ mahrūm hanūz

ham abhī tak haiñ isī daur-e-ḳhizāñ se guzre

un ke qadmoñ ke nishāñ dekh le tū bhī aa kar

tere dīvāne abhī bazm-e-jahāñ se guzre

haal kuchh kahne ko pahuñche the ham un ke dar par

zaḳhm siine meñ liye un ke yahāñ se guzre

ghar jalā maal luTā ḳhuun bahā jaan ga.ī

ham tire daur meñ kab amn-o-amāñ se guzre

haa.e vo ‘ahd-e-guzishta ke sunahre ayyām

yuuñ ga.e jaise koī tiir kamāñ se guzre

maut par merī ‘azīzoñ ko 'zakī' kyoñ ġham hai

kaun aisā hai jo ik din na yahāñ se guzre

sho'la-zaron se kabhi aab-e-rawan se guzre

hum teri rah mein har sud-o-ziyan se guzre

fasl-e-gul se teri ai dost hain mahrum hanuz

hum abhi tak hain isi daur-e-KHizan se guzre

un ke qadmon ke nishan dekh le tu bhi aa kar

tere diwane abhi bazm-e-jahan se guzre

haal kuchh kahne ko pahunche the hum un ke dar par

zaKHm sine mein liye un ke yahan se guzre

ghar jala mal luTa KHun baha jaan gai

hum tere daur mein kab amn-o-aman se guzre

hae wo ‘ahd-e-guzishta ke sunahre ayyam

yun gae jaise koi tir kaman se guzre

maut par meri ‘azizon ko 'zaki' kyon gham hai

kaun aisa hai jo ek din na yahan se guzre