shoala-e-gul se rang-e-shafaq tak aariz-o-lab ki baat gai

sho.ala-e-gul se rang-e-shafaq tak āriz-o-lab kī baat ga.ī

chhiḌ gayā jab bhī terā qissa ḳhatm huā din raat ga.ī

sūkhe hoñT to buuñd ko tarse miinā ḳhālī jaam tahī

lekin phir bhī chand laboñ tak saaqī kī sauġhāt ga.ī

sargoshī meñ baat jo kī thī kyā thī ham ḳhud bhuul ga.e

lekin ek fasāna ban kar duniyā tak vo baat ga.ī

yādoñ ke zahrīle nashtar TuuT rahe haiñ rag rag meñ

barsā kar kuchh aise sho.ale ab ke baras barsāt ga.ī

siskī ik majbūr dulhan kī zehn meñ ubhrī rah rah kar

shahnā.ī kī guuñj meñ 'afsar' jab bhī koī bārāt ga.ī

shoala-e-gul se rang-e-shafaq tak aariz-o-lab ki baat gai

chhiD gaya jab bhi tera qissa KHatm hua din raat gai

sukhe honT to bund ko tarse mina KHali jam tahi

lekin phir bhi chand labon tak saqi ki saughat gai

sargoshi mein baat jo ki thi kya thi hum KHud bhul gae

lekin ek fasana ban kar duniya tak wo baat gai

yaadon ke zahrile nashtar TuT rahe hain rag rag mein

barsa kar kuchh aise shoale ab ke baras barsat gai

siski ek majbur dulhan ki zehn mein ubhri rah rah kar

shahnai ki gunj mein 'afsar' jab bhi koi baraat gai