شعلہ مری آنکھوں سے عیاں کیوں نہیں ہوتا

شعلہ مری آنکھوں سے عیاں کیوں نہیں ہوتا

ایسا ابھی اے سوز نہاں کیوں نہیں ہوتا

آیا ہوں صنم خانے میں کعبہ سے نکل کر

حاصل مجھے دیدار بتاں کیوں نہیں ہوتا

جب پرسش احوال پہ مائل ہیں وہ خود ہی

حال دل بیتاب بیاں کیوں نہیں ہوتا

ہر وقت تصور میں رہا کرتا ہوں پھر بھی

آباد مرے دل کا جہاں کیوں نہیں ہوتا

جب لال پری شیشے میں موجود ہے ساقی

پھر بزم کا رنگین سماں کیوں نہیں ہوتا

برباد جو اک آن میں ہو جاتا ہے غنچہ

ہر خار مگر نذر خزاں کیوں نہیں ہوتا

چبھ جاتا ہے جب تیر ستم دل ہی میں جا کر

سینے پہ عیاں کوئی نشاں کیوں نہیں ہوتا

گلشن میں نشیمن تو مرا پھونک چکی پھر

ٹھنڈا ترا دل برق تپاں کیوں نہیں ہوتا