shoala meri aankhon se ayan kyon nahin hota

sho.ala mirī āñkhoñ se ayaañ kyoñ nahīñ hotā

aisā abhī ai soz-e-nihāñ kyoñ nahīñ hotā

aayā huuñ sanam-ḳhāne meñ ka.abe se nikal kar

hāsil mujhe dīdār-e-butāñ kyoñ nahīñ hotā

jab pursish-e-ahvāl pe maa.il haiñ vo ḳhud hī

hāl-e-dil-e-betāb bayāñ kyoñ nahīñ hotā

har-vaqt tasavvur meñ rahā kartā huuñ phir bhī

ābād mire dil kā jahāñ kyoñ nahīñ hotā

jab laal parī shīshe meñ maujūd hai saaqī

phir bazm kā rangīn samāñ kyoñ nahīñ hotā

barbād jo ik aan meñ ho jaatā hai ġhuncha

har ḳhaar magar nazr-e-ḳhizāñ kyoñ nahīñ hotā

chubh jaatā hai jab tīr-e-sitam dil hī meñ jā kar

siine pe ayaañ koī nishāñ kyoñ nahīñ hotā

gulshan meñ nasheman to mirā phūñk chukī phir

ThanDā tirā dil barq-e-tapāñ kyoñ nahīñ hotā

shoala meri aankhon se ayan kyon nahin hota

aisa abhi ai soz-e-nihan kyon nahin hota

aaya hun sanam-KHane mein kabe se nikal kar

hasil mujhe didar-e-butan kyon nahin hota

jab pursish-e-ahwal pe mail hain wo KHud hi

haal-e-dil-e-betab bayan kyon nahin hota

har-waqt tasawwur mein raha karta hun phir bhi

aabaad mere dil ka jahan kyon nahin hota

jab lal pari shishe mein maujud hai saqi

phir bazm ka rangin saman kyon nahin hota

barbaad jo ek aan mein ho jata hai ghuncha

har KHar magar nazr-e-KHizan kyon nahin hota

chubh jata hai jab tir-e-sitam dil hi mein ja kar

sine pe ayan koi nishan kyon nahin hota

gulshan mein nasheman to mera phunk chuki phir

ThanDa tera dil barq-e-tapan kyon nahin hota