shohrat hai meri suKHan-wari ki

shohrat hai merī suḳhan-varī kī

hindī meñ hai tarz fārsī kī

kyuuñ zikr-e-visāl se ḳhafā ho

ye baat to hai hañsī-ḳhushī kī

allāh re nazākat-e-lab-e-yār

but-ḳhāne paḌe jo mai-kashī kī

shikva na karūñ maiñ tā-lab-e-gor

dushman bhī kahe ki dostī kī

ho dīda-e-mehr shabnam-afshāñ

hālat jo dikhā.ūñ be-kasī kī

jab maut kisī tarah na aa.e

ghabrā kar ham ne āshiqī kī

ḳhāmosh ho sham.a rote rote

taqrīr karūñ jo ḳhāmushī kī

ai maut azaab se chhuḌāyā

is qaid se tū ne muḳhlisī kī

bulbul ko kiyā asīr-e-gul-dām

sayyād ne ḳhuub munsifī kī

dekhā jo vo rashk-e-māh-e-kan.āñ

rañgat huī zar-dastarī kī

pahuñche na ba-rañg-e-shāna tā zulf

kyā baḳht-e-siyah ne kotāhī kī

dozaḳh kī tarah jaleñ na zāhid

jannat meñ bhī ham ne mai-kashī kī

naale kiye chupke chupke ro.e

kyā kyā ġham yaar kī ḳhushī kī

ġhūloñ ne lahad pe huuñ vo vahshī

āñkhoñ se aa ke raushnī kī

ai 'arsh' ḳhudā-o-but ahad haiñ

mushrik ko samā.ī hai duī kī

shohrat hai meri suKHan-wari ki

hindi mein hai tarz farsi ki

kyun zikr-e-visal se KHafa ho

ye baat to hai hansi-KHushi ki

allah re nazakat-e-lab-e-yar

but-KHane paDe jo mai-kashi ki

shikwa na karun main ta-lab-e-gor

dushman bhi kahe ki dosti ki

ho dida-e-mehr shabnam-afshan

haalat jo dikhaun be-kasi ki

jab maut kisi tarah na aae

ghabra kar hum ne aashiqi ki

KHamosh ho shama rote rote

taqrir karun jo KHamushi ki

ai maut azab se chhuDaya

is qaid se tu ne muKHlisi ki

bulbul ko kiya asir-e-gul-dam

sayyaad ne KHub munsifi ki

dekha jo wo rashk-e-mah-e-kanan

rangat hui zar-dastari ki

pahunche na ba-rang-e-shana ta zulf

kya baKHt-e-siyah ne kotahi ki

dozaKH ki tarah jalen na zahid

jannat mein bhi hum ne mai-kashi ki

nale kiye chupke chupke roe

kya kya gham yar ki KHushi ki

ghulon ne lahad pe hun wo wahshi

aankhon se aa ke raushni ki

ai 'arsh' KHuda-o-but ahad hain

mushrik ko samai hai dui ki