shoKH masum si allhaD wo kunwari baaten

shoḳh māsūm sī allhaḌ vo kuñvārī bāteñ

yaad aatī haiñ mujhe aap kī pyārī bāteñ

naaz se rūThnā phir un kā manānā mujh ko

yaad aane lagīñ rah rah ke vo saarī bāteñ

āstīñ apne hī ashkoñ se bhigo Dāloge

yaad ā.eñgī tumheñ jab bhī hamārī bāteñ

kī ḳhatā tum ne ki ham ne use kal socheñge

aaj kī raat to ye chhoḌiye saarī bāteñ

aaj ke daur meñ har roz hī sunñā hoñgī

be-hisī se bharī mafhūm se aarī bāteñ

un ko bhātī nahīñ ye baat alag hai 'bāno'

dil meñ rakh lene ke qābil haiñ tumhārī bāteñ

shoKH masum si allhaD wo kunwari baaten

yaad aati hain mujhe aap ki pyari baaten

naz se ruThna phir un ka manana mujh ko

yaad aane lagin rah rah ke wo sari baaten

aastin apne hi ashkon se bhigo Daloge

yaad aaengi tumhein jab bhi hamari baaten

ki KHata tum ne ki hum ne use kal sochenge

aaj ki raat to ye chhoDiye sari baaten

aaj ke daur mein har roz hi sunna hongi

be-hisi se bhari mafhum se aari baaten

un ko bhati nahin ye baat alag hai 'bano'

dil mein rakh lene ke qabil hain tumhaari baaten