shola-e-ishq mein jo dil ko tapan rakhte hain

shola-e-ishq meñ jo dil ko tapāñ rakhte haiñ

apnī ḳhātir meñ kahāñ kaun-o-makāñ rakhte haiñ

sar jhukāte haiñ usī dar pe ki vo jāntā hai

ham faqīrī meñ bhī andāz-e-shahāñ rakhte haiñ

bādbāñ chaak hai aur bād-e-muḳhālif muñh-zor

hausla ye hai ki kashtī ko ravāñ rakhte haiñ

vahshat-e-dil ne hameñ chain se jiine na diyā

chashm giryāñ kabhī jaañ shola-fishāñ rakhte haiñ

us ko fursat nahīñ to ham bhī zabāñ kyuuñ kholeñ

varna siine meñ gul-e-zaḳhm nihāñ rakhte haiñ

arsh-tā-farsh phirāyā gayā kūcha kūcha

ab ḳhudā jaane mirī ḳhaak kahāñ rakhte haiñ

dil meñ vo rashk-e-gulistāñ liye phirte haiñ 'shamīm'

phuul khilte haiñ qadam aap jahāñ rakhte haiñ

shola-e-ishq mein jo dil ko tapan rakhte hain

apni KHatir mein kahan kaun-o-makan rakhte hain

sar jhukate hain usi dar pe ki wo jaanta hai

hum faqiri mein bhi andaz-e-shahan rakhte hain

baadban chaak hai aur baad-e-muKHalif munh-zor

hausla ye hai ki kashti ko rawan rakhte hain

wahshat-e-dil ne hamein chain se jine na diya

chashm giryan kabhi jaan shola-fishan rakhte hain

us ko fursat nahin to hum bhi zaban kyun kholen

warna sine mein gul-e-zaKHm nihan rakhte hain

arsh-ta-farsh phiraya gaya kucha kucha

ab KHuda jaane meri KHak kahan rakhte hain

dil mein wo rashk-e-gulistan liye phirte hain 'shamim'

phul khilte hain qadam aap jahan rakhte hain