shor-e-aindagan hai dusri samt

shor-e-ā.indagāñ hai dūsrī samt

ek ātish-fishāñ hai dūsrī samt

is taraf to charāġh-e-dil bhī nahīñ

aur ik kahkashāñ hai dūsrī samt

dūsrī samt jā rahā huuñ maiñ

merī jānib ravāñ hai dūsrī samt

merī jānib hai ik charāġh kī lau

aur saarā jahāñ hai dūsrī samt

vahī ġhauġhā hai shor-o-ġhul hai vahī

vahī shor-e-sagāñ hai dūsrī samt

phir mujhe ek dil dikhāyā gayā

maiñ ne pūchhā kahāñ hai dūsrī samt

mujhe DhūñDo na shash-jihāt meñ tum

maiñ vahāñ huuñ jahāñ hai dūsrī samt

maiñ ki āvāz de rahā huuñ yahāñ

aur mirī ham-zabāñ hai dūsrī samt

sīdhe raste pe chalne vaalā huuñ

ya.anī mujh par girāñ hai dūsrī samt

is taraf to koī savāl nahīñ

ḳhvāb kā imtihāñ hai dūsrī samt

chashm-e-hairat ne khol dī hai girah

be-nishāñ kā makāñ hai dūsrī samt

lā-makāñ meñ makān maḳhfī hai

be-nishāñ kā nishāñ hai dūsrī samt

shor-e-aindagan hai dusri samt

ek aatish-fishan hai dusri samt

is taraf to charagh-e-dil bhi nahin

aur ek kahkashan hai dusri samt

dusri samt ja raha hun main

meri jaanib rawan hai dusri samt

meri jaanib hai ek charagh ki lau

aur sara jahan hai dusri samt

wahi ghaugha hai shor-o-ghul hai wahi

wahi shor-e-sagan hai dusri samt

phir mujhe ek dil dikhaya gaya

main ne puchha kahan hai dusri samt

mujhe DhunDo na shash-jihat mein tum

main wahan hun jahan hai dusri samt

main ki aawaz de raha hun yahan

aur meri ham-zaban hai dusri samt

sidhe raste pe chalne wala hun

yani mujh par giran hai dusri samt

is taraf to koi sawal nahin

KHwab ka imtihan hai dusri samt

chashm-e-hairat ne khol di hai girah

be-nishan ka makan hai dusri samt

la-makan mein makan maKHfi hai

be-nishan ka nishan hai dusri samt