شور جہاں سے جب تھک جاؤ مجھ کو تنہا پڑھنا تم

شور جہاں سے جب تھک جاؤ مجھ کو تنہا پڑھنا تم

سیدھا سیدھا دل پہ لگوں گا اک دن الٹا پڑھنا تم

ہجر کی قسمیں لکھی ہوئی ہیں زرد پرانے پتوں پر

کوئی اپنا بچھڑ چلا تو پھر سے ملنا پڑھنا تم

دریا پر کچھ تحریریں ہیں تیز ہوا کے ہاتھوں کی

قدرت کی نقاشی والا اک اک جلوہ پڑھنا تم

غم کا فسانہ یاد آ جائے شاید روشن لفظوں میں

اپنی محبت کے چشمے سے میرا چہرہ پڑھنا تم

نیا زمانہ بھول چکا ہے گئے زمانے کی قدریں

جب چہروں کی بھیڑ لگی ہو کچھ تو اپنا پڑھنا تم

جانے کب سے سطح ادب پر ایسا ہی ہے لکھا ہوا

لکھنا لکھنا سیکھ گئے تو پڑھنا پڑھنا پڑھنا تم

بے جاں ان تصویروں میں اب آوازوں کے رنگ بھریں

دونوں کا میں نام لکھوں گا چاہے اپنا پڑھنا تم