shor-e-jahan se jab thak jao mujhko tanha paDhna tum

shor-e-jahāñ se jab thak jaao mujh ko tanhā paḌhnā tum

sīdhā sīdhā dil pe lagūñgā ik din ulTā paḌhnā tum

hijr kī qasmeñ likkhī huī haiñ zard purāne pattoñ par

koī apnā bichhaḌ chalā to phir se milnā paḌhnā tum

dariyā par kuchh tahrīreñ haiñ tez havā ke hāthoñ kī

qudrat kī naqqāshī vaalā ik ik jalva paḌhnā tum

ġham kā fasāna yaad aa jaa.e shāyad raushan lafzoñ meñ

apnī mohabbat ke chashme se merā chehra paḌhnā tum

nayā zamāna bhuul chukā hai ga.e zamāne kī qadreñ

jab chehroñ kī bhiiḌ lagī ho kuchh to apnā paḌhnā tum

jaane kab se sat.h-e-adab par aisā hī hai likkhā huā

likhnā likhnā siikh ga.e to paḌhnā paḌhnā paḌhnā tum

be-jāñ in tasvīroñ meñ ab āvāzoñ ke rang bhareñ

donoñ kā maiñ naam likhūñgā chāhe apnā paḌhnā tum

shor-e-jahan se jab thak jao mujh ko tanha paDhna tum

sidha sidha dil pe lagunga ek din ulTa paDhna tum

hijr ki qasmen likkhi hui hain zard purane patton par

koi apna bichhaD chala to phir se milna paDhna tum

dariya par kuchh tahriren hain tez hawa ke hathon ki

qudrat ki naqqashi wala ek ek jalwa paDhna tum

gham ka fasana yaad aa jae shayad raushan lafzon mein

apni mohabbat ke chashme se mera chehra paDhna tum

naya zamana bhul chuka hai gae zamane ki qadren

jab chehron ki bhiD lagi ho kuchh to apna paDhna tum

jaane kab se sath-e-adab par aisa hi hai likkha hua

likhna likhna sikh gae to paDhna paDhna paDhna tum

be-jaan in taswiron mein ab aawazon ke rang bharen

donon ka main nam likhunga chahe apna paDhna tum