shor ek halqa-e-yaran mein sunai dega

shor ek halqa-e-yārāñ meñ sunā.ī degā

jab zamāna mirī ulfat kī gavāhī degā

ab to uḌne kā hunar bhuul ga.e haiñ panchhī

ab bhalā kyā unheñ sayyād rihā.ī degā

us ke dil meñ to koī aur makīñ hai kab se

ḳhud talak vo na kabhī mujh ko rasā.ī degā

jāntā huuñ ki vo be-rahm na baḳhshegā mujhe

jāntā huuñ vo mujhe dāġh-e-judā.ī degā

dekhnā hijr meñ us ke maiñ marūñgā ik din

merī mayyat pe vo ro ro ke duhā.ī degā

dil to dil 'aql-o-ḳhirad par bhī hai qabza us kā

ab ba-juz us ke bhalā kaun dikhā.ī degā

ek hī shaḳhs magar vo bhī ḳhudā ne na diyā

ham to samjhe the ḳhudā ham ko ḳhudā.ī degā

aaj tanhā huuñ magar dekhnā ik din 'haidar'

merī āvāz pe labbaik sunā.ī degā

shor ek halqa-e-yaran mein sunai dega

jab zamana meri ulfat ki gawahi dega

ab to uDne ka hunar bhul gae hain panchhi

ab bhala kya unhen sayyaad rihai dega

us ke dil mein to koi aur makin hai kab se

KHud talak wo na kabhi mujh ko rasai dega

jaanta hun ki wo be-rahm na baKHshega mujhe

jaanta hun wo mujhe dagh-e-judai dega

dekhna hijr mein us ke main marunga ek din

meri mayyat pe wo ro ro ke duhai dega

dil to dil 'aql-o-KHirad par bhi hai qabza us ka

ab ba-juz us ke bhala kaun dikhai dega

ek hi shaKHs magar wo bhi KHuda ne na diya

hum to samjhe the KHuda hum ko KHudai dega

aaj tanha hun magar dekhna ek din 'haidar'

meri aawaz pe labbaik sunai dega