شور شرابہ چھوڑ کے پہنچا ویرانی تک

شور شرابہ چھوڑ کے پہنچا ویرانی تک

چلتے چلتے چھوٹ گیا دانہ پانی تک

آگ نے مجھ سے ہاتھ ملایا گھر آ بیٹھی

آنکھیں پھاڑے دیکھ رہی ہے حیرانی تک

ڈوب گئے تو ساری دنیا برا کہے گی

دیکھو مجھ میں پاؤں نہ رکھنا طغیانی تک

اتنا آساں تو نہیں اس کا واپس ہونا

بیچ کے ایماں پہنچا ہے بے ایمانی تک

صبح کو اٹھ کر دیکھا تو مجھ پر راز کھلا یہ

چاند کی ساری شہرت ہے بس تابانی تک

ہم تو ہم ہیں تاجوروں پر رعب وہ چھایا

پاؤں پہ اس کے رکھ دئے تاج سلطانی تک

آگ در و دیوار خرد کو راکھ بنائے

کچھ نہ بچے تو ہم کو پہنچائے پانی تک

شرم سے کوئی مرنا چاہے تو بھی کرے کیا

یاورؔ اب نایاب ہے چلو بھر پانی تک