شورش بیگانگی کی ابتدا ہم سے ہوئی

شورش بیگانگی کی ابتدا ہم سے ہوئی

پاس رہ کر دور رہنے کی خطا ہم سے ہوئی

زندگی میں کون سے ہم سے گنہ سرزد ہوئے

کیوں تری چشم کرم ناآشنا ہم سے ہوئی

ماسوائے دید تیری ہم نے کچھ چاہا نہ تھا

کس نے کی تھی التجا کب التجا ہم سے ہوئی

تیرے در پر میرے سجدے درد سے لبریز تھے

ایسے میں توہین کیونکر جا بجا ہم سے ہوئی

لوگ اپنا حال دل گیتوں میں کرتے ہیں بیاں

عشق میں تو ابتدا حمد و ثنا ہم سے ہوئی

جان لیتے راز ہستی راز حق ہوتا اگر

تیری قدرت یوں تو صورت آشنا ہم سے ہوئی

دل ہی تھا جو رنج و غم میں شور و شر کرتا رہا

فرط غم میں شورش ارض و سما ہم سے ہوئی

آشیاں اجڑا گلوں کے چہرے مرجھائے رفیقؔ

کیا گنہ آلودہ یہ باد صبا ہم سے ہوئی