shuur-o-fikr ke aise itab TuTte hain

shu'ūr-o-fikr ke aise 'itāb TūTte haiñ

khile baġhair hī dil ke gulāb TūTte haiñ

tahī ho jeb to bharte haiñ saare mansūbe

hisāb rakhte hue be-hisāb TūTte haiñ

lahū lahū nazar aatī hai dil kī vīrānī

saje-sajā.e jab āñkhoñ se ḳhvāb TūTte haiñ

sukūt-e-lab pe hai vo naġhmagī ki jis ke liye

suḳhan ke rhythm navā ke rabāb TūTte haiñ

tire vujūd se hotī hai jab shanāsā.ī

tamām 'umr ke sab intisāb TūTte haiñ

nafas nafas ye bikhartī hayāt ke manzar

havā ke lams se jaise hubāb TūTte haiñ

laboñ se lafz nikalte haiñ aag kī sūrat

jab āgahī ke mirī āftāb TūTte haiñ

sar-e-shu'ūr mile haiñ malāmatoñ ke hujūm

jab e'timād sar-e-intiḳhāb TūTte haiñ

haqāratoñ kī zamīñ dafn bhī nahīñ kartī

'zafar' jab ahl-e-karam ke 'azāb TūTte haiñ

shu'ur-o-fikr ke aise 'itab TuTte hain

khile baghair hi dil ke gulab TuTte hain

tahi ho jeb to bharte hain sare mansube

hisab rakhte hue be-hisab TuTte hain

lahu lahu nazar aati hai dil ki virani

saje-sajae jab aankhon se KHwab TuTte hain

sukut-e-lab pe hai wo naghmagi ki jis ke liye

suKHan ke rhythm nawa ke rabab TuTte hain

tere wujud se hoti hai jab shanasai

tamam 'umr ke sab intisab TuTte hain

nafas nafas ye bikharti hayat ke manzar

hawa ke lams se jaise hubab TuTte hain

labon se lafz nikalte hain aag ki surat

jab aagahi ke meri aaftab TuTte hain

sar-e-shu'ur mile hain malamaton ke hujum

jab e'timad sar-e-intiKHab TuTte hain

haqaraton ki zamin dafn bhi nahin karti

'zafar' jab ahl-e-karam ke 'azab TuTte hain