شعاع عشق و محبت کے جھلملانے تک

شعاع عشق و محبت کے جھلملانے تک

چراغ جلتے رہیں گے تمہارے آنے تک

یہ راستہ ہی سہی اس کی خاصیت یہ ہے

پہنچ رہا ہے تمہارے نگار خانے تک

تجھے ہر ایک گھڑی یاد کرنے سے لے کر

ہے اک طویل مسافت تجھے بھلانے تک

نہ جانے کس کی نظر نے کیا ہے عشق رواں

یہ دریا سوکھ چکا تھا کبھی دہانے تک

وہ چاند تھا کہ نہ ہاتھ آ سکا کسی صورت

چکور پھرتا رہا پیچھے اک زمانے تک

وہ آسماں کی بلندی تک آتے بھی کیسے

رسائی فکر کی جن کی تھی آب و دانے تک

نہ جانے فاصلے کتنے سمیٹ کر عاقبؔ

ہم اپنے دور سے پہنچے ترے زمانے تک

اسے سمجھنے میں کتنے ہی پیچ ہوں عاقبؔ

یہ نقشہ وہ ہے جو لے جائے گا خزانے تک