shukriya hasti ka! lekin tumne ye kya kar diya

shukriya hastī kaa! lekin tum ne ye kyā kar diyā

parde hī parde meñ apnā raaz ifshā kar diyā

maañg kar ham laa.e the allāh se ik dard-e-ishq

vo bhī ab taqdīr ne auroñ kā hissa kar diyā

do hī angāre the hāthoñ meñ ḳhudā-e-ishq ke

ek ko dil ek ko merā kalejā kar diyā

jab tajallī un kī barq-arzāniyoñ par aa ga.ī

aable se dil ke paidā tūr-e-sīnā kar diyā

apnī is vāraftagī-e-shauq kā mamnūn huuñ

bār-hā mujh ko bharī mahfil meñ tanhā kar diyā

vāqi.āt-e-ishq kā thā lamha lamha ik sadī

har nafas meñ maiñ ne ik armān puurā kar diyā

marhamat farmā ke ai 'sīmāb' ġham kī lazzateñ

ziist kī talḳhī ko fitrat ne gavārā kar diyā

shukriya hasti ka! lekin tum ne ye kya kar diya

parde hi parde mein apna raaz ifsha kar diya

mang kar hum lae the allah se ek dard-e-ishq

wo bhi ab taqdir ne auron ka hissa kar diya

do hi angare the hathon mein KHuda-e-ishq ke

ek ko dil ek ko mera kaleja kar diya

jab tajalli un ki barq-arzaniyon par aa gai

aable se dil ke paida tur-e-sina kar diya

apni is waraftagi-e-shauq ka mamnun hun

bar-ha mujh ko bhari mahfil mein tanha kar diya

waqiat-e-ishq ka tha lamha lamha ek sadi

har nafas mein main ne ek arman pura kar diya

marhamat farma ke ai 'simab' gham ki lazzaten

zist ki talKHi ko fitrat ne gawara kar diya