shurua din se kisi sitare ki ungliyon mein qalam nahin hai

shurūa din se kisī sitāre kī uñgliyoñ meñ qalam nahīñ hai

siyāh shab ke qadīm kāġhaz pe koī sūraj raqam nahīñ hai

maiñ dasht-e-vahshat meñ raqs kartā to mujh pe shāyad ye raaz khultā

ḳhirad hai muhtāj-e-āb-o-dāna junūñ asīr-e-shikam nahīñ hai

vo ik samundar hai be-misālī meñ chand qatroñ kā ik savālī

vo kam se kam bhī atā jo kar de bahut hai mujh ko vo kam nahīñ hai

tumhārī āñkhoñ kā kyā karūñ maiñ tumhāre zehnoñ ko kyā kahūñ maiñ

tabāh rātoñ kā dukh hai tum ko bujhe charāġhoñ kā ġham nahīñ hai

maiñ raushnī ke chamakte shānoñ pe paañv rakh kar guzar rahā huuñ

falak hai mere safar kī manzil zamīn zer-e-qadam nahīñ hai

hamāre rone se us kā dil jo nahīñ pasījā to kyā shikāyat

ki jis se poñchhe the ham ne aañsū vo āstīñ bhī to nam nahīñ hai

maiñ is se pahle bhī kohsāroñ meñ apnā rastā banā chukā huuñ

na.e pahāḌoñ se kah do jā kar ye merā pahlā janam nahīñ hai

hamārī kashtī ke ek chappū pe yā-mohammad likhā huā hai

hamārī kashtī se paar paa.e kisī samundar meñ dam nahīñ hai

na koī girya na kuchh taġhāful jo TūTnā hai to TuuT jaa.e

hamārī sāñsoñ kī Dor hai ye tumhāre sar kī qasam nahīñ hai

shurua din se kisi sitare ki ungliyon mein qalam nahin hai

siyah shab ke qadim kaghaz pe koi suraj raqam nahin hai

main dasht-e-wahshat mein raqs karta to mujh pe shayad ye raaz khulta

KHirad hai muhtaj-e-ab-o-dana junun asir-e-shikam nahin hai

wo ek samundar hai be-misali mein chand qatron ka ek sawali

wo kam se kam bhi ata jo kar de bahut hai mujh ko wo kam nahin hai

tumhaari aankhon ka kya karun main tumhaare zehnon ko kya kahun main

tabah raaton ka dukh hai tum ko bujhe charaghon ka gham nahin hai

main raushni ke chamakte shanon pe panw rakh kar guzar raha hun

falak hai mere safar ki manzil zamin zer-e-qadam nahin hai

hamare rone se us ka dil jo nahin pasija to kya shikayat

ki jis se ponchhe the hum ne aansu wo aastin bhi to nam nahin hai

main is se pahle bhi kohsaron mein apna rasta bana chuka hun

nae pahaDon se kah do ja kar ye mera pahla janam nahin hai

hamari kashti ke ek chappu pe ya-mohammad likha hua hai

hamari kashti se par pae kisi samundar mein dam nahin hai

na koi girya na kuchh taghaful jo TuTna hai to TuT jae

hamari sanson ki Dor hai ye tumhaare sar ki qasam nahin hai