شروع ہونے کا مطلب ہی اختتام نہ ہو

شروع ہونے کا مطلب ہی اختتام نہ ہو

مری شکست کہیں تجھ سے انتقام نہ ہو

شناخت سب سے بڑا نفسیاتی مسئلہ ہے

میں چاہتا ہوں کسی شے کا کوئی نام نہ ہو

انا زیادہ ضروری ہے سانس کی نسبت

سپاہی مرتا ہے مر جائے پر غلام نہ ہو

مجھے تو دل نے عجب وسوسوں میں ڈال دیا

شکست و ریخت کسی طرز کا کلام نہ ہو

ابھی تلک وہ مری آنکھ سے نہیں نکلا

نئے شکاری کی جنگل میں پہلی شام نہ ہو

ہمیشہ ٹھہری ہوئی شے نشانہ بنتی ہے

خیال رکھنا کہ رہ میں کہیں قیام نہ ہو

سگ زمانہ سلیقے سے عاری ہے حمزہؔ

سخن وری کسی درویش کا ہی کام نہ ہو