shuur chahiye izhaar-o-agahi ke liye

shu.ūr chāhiye izhār-o-āgahī ke liye

ḳhushī hai ġham ke liye aur ġham ḳhushī ke liye

hazār jalve nazar ke liye haiñ aalam meñ

nigāh-e-shauq hai lekin kisī kisī ke liye

zarā havāoñ ke ruḳh par bhī ik nazar Dāleñ

charāġh DhūñD rahe haiñ jo raushnī ke liye

kisī ne ye bhī na pūchhā ki kyā guzartī hai

ham apne aap se jaate rahe kisī ke liye

ye raaz pūchhe to parvāne se koī pūchhe

ki be-sabab koī martā nahīñ kisī ke liye

riyāz-e-ishq meñ aisī bhī ik bahār aa.ī

nigāh-e-shauq ne bose kalī kalī ke liye

kise ḳhabar thī ki ḳhud raushnī ko tarsegā

charāġh-e-ishq jalāyā thā raushnī ke liye

usī kā naam farishtoñ ke naam se chamkā

jo aadmī huā qurbān dostī ke liye

hazār qudrat-e-azm-o-amal sahī lekin

ḳhalā kā ḳhauf bhī lāzim hai aadmī ke liye

davā-e-dard agar aap se nahīñ hotī

duā-e-marg hī kar jā.iye 'rishī' ke liye

shuur chahiye izhaar-o-agahi ke liye

KHushi hai gham ke liye aur gham KHushi ke liye

hazar jalwe nazar ke liye hain aalam mein

nigah-e-shauq hai lekin kisi kisi ke liye

zara hawaon ke ruKH par bhi ek nazar Dalen

charagh DhunD rahe hain jo raushni ke liye

kisi ne ye bhi na puchha ki kya guzarti hai

hum apne aap se jate rahe kisi ke liye

ye raaz puchhe to parwane se koi puchhe

ki be-sabab koi marta nahin kisi ke liye

riyaz-e-ishq mein aisi bhi ek bahaar aai

nigah-e-shauq ne bose kali kali ke liye

kise KHabar thi ki KHud raushni ko tarsega

charagh-e-ishq jalaya tha raushni ke liye

usi ka nam farishton ke nam se chamka

jo aadmi hua qurban dosti ke liye

hazar qudrat-e-azm-o-amal sahi lekin

KHala ka KHauf bhi lazim hai aadmi ke liye

dawa-e-dard agar aap se nahin hoti

dua-e-marg hi kar jaiye 'rishi' ke liye