shuur-e-hosh se begana kah diya hota

shu.ūr-e-hosh se begāna kah diyā hotā

zarā sī baat thī dīvāna kah diyā hotā

huī ye ḳhair na dekhā mirī taraf varna

nigāh-e-shauq ne afsāna kah diyā hotā

agar na hotīñ in āñkhoñ kī mastiyāñ maḳhsūs

to aam logoñ ne mai-ḳhāna kah diyā hotā

kahā har ek ne mujh ko tumhārā dīvāna

kabhī to tum ne bhī dīvāna kah diyā hotā

mire sabab se zamāne kā kyuuñ liyā ilzām

hai aadmī koī dīvāna kah diyā hotā

ye vāqi.a hai agar shahr meñ na hote tum

to maiñ ne shahr ko vīrāna kah diyā hotā

na baḌhtī baat mohabbat meñ is qadar 'sā.ib'

jo us ne apnoñ meñ begāna kah diyā hotā

shuur-e-hosh se begana kah diya hota

zara si baat thi diwana kah diya hota

hui ye KHair na dekha meri taraf warna

nigah-e-shauq ne afsana kah diya hota

agar na hotin in aankhon ki mastiyan maKHsus

to aam logon ne mai-KHana kah diya hota

kaha har ek ne mujh ko tumhaara diwana

kabhi to tum ne bhi diwana kah diya hota

mere sabab se zamane ka kyun liya ilzam

hai aadmi koi diwana kah diya hota

ye waqia hai agar shahr mein na hote tum

to main ne shahr ko virana kah diya hota

na baDhti baat mohabbat mein is qadar 'saib'

jo us ne apnon mein begana kah diya hota