shuur-e-zat ne bedar kar diya mujhko

shu.ūr-e-zāt ne bedār kar diyā mujh ko

badan ko chaaT ke mismār kar diyā mujh ko

sabhī daraḳht kushāda the bāzūoñ kī tarah

ajiib raah thī sarshār kar diyā mujh ko

phir ek ḳhvāb ne dastak kā baab band kiyā

aur ek niiñd meñ bedār kar diyā mujh ko

nazar ke sāmne ik nīlgūñ samundar thā

bas ek mauj thī ki paar kar diyā mujh ko

maiñ us se pahle mohabbat meñ jaan de detā

kisī nazar ne ḳhabar-dār kar diyā mujh ko

azal se sahl thā fitrat kī asl par 'jāved'

ye kis ne aur bhī dushvār kar diyā mujh ko

shuur-e-zat ne bedar kar diya mujh ko

badan ko chaT ke mismar kar diya mujh ko

sabhi daraKHt kushada the bazuon ki tarah

ajib rah thi sarshaar kar diya mujh ko

phir ek KHwab ne dastak ka bab band kiya

aur ek nind mein bedar kar diya mujh ko

nazar ke samne ek nilgun samundar tha

bas ek mauj thi ki par kar diya mujh ko

main us se pahle mohabbat mein jaan de deta

kisi nazar ne KHabar-dar kar diya mujh ko

azal se sahl tha fitrat ki asl par 'jawed'

ye kis ne aur bhi dushwar kar diya mujh ko