sidha chalne mein dushwari hoti hai

sīdhā chalne meñ dushvārī hotī hai

ḳhālī jeb bhī kitnī bhārī hotī hai

mujhe batāyā baaġh meñ bād-e-sarsar ne

sahrā meñ bhī bād-e-bahārī hotī hai

maiñ vahshat meñ phuul masalne lagtā huuñ

mujh par jab vo ḳhushbū taarī hotī hai

mujh ko aap azā-ḳhāna kah sakte haiñ

jitnī mujh meñ girya-o-zārī hotī hai

sab se pahle vahī nishāna bante haiñ

jin hirnoñ kī aañkh shikārī hotī hai

ye misra to milā hai mujh ko virse meñ

sab se baḌī daulat ḳhuddārī hotī hai

dīvāna 'armān' maiñ un ko māntā huuñ

jin kī sanad sahrā se jaarī hotī hai

sidha chalne mein dushwari hoti hai

KHali jeb bhi kitni bhaari hoti hai

mujhe bataya bagh mein baad-e-sarsar ne

sahra mein bhi baad-e-bahaari hoti hai

main wahshat mein phul masalne lagta hun

mujh par jab wo KHushbu tari hoti hai

mujh ko aap aza-KHana kah sakte hain

jitni mujh mein girya-o-zari hoti hai

sab se pahle wahi nishana bante hain

jin hirnon ki aankh shikari hoti hai

ye misra to mila hai mujh ko wirse mein

sab se baDi daulat KHuddari hoti hai

diwana 'arman' main un ko manta hun

jin ki sanad sahra se jari hoti hai