صیغۂ راز میں ہے مقصد تخلیق کا راز

صیغۂ راز میں ہے مقصد تخلیق کا راز

لا مکاں تک ہے کہاں مرغ خرد کی پرواز

بے سروری ہیں اسیران شریعت کے سجود

بے حضوری ہے غلامان طریقت کی نماز

اس کی آنکھوں میں بجز حرف دعا کچھ بھی نہیں

جس کو قدرت نے عطا کی تھی نگاہ شہباز

روح کی سمت بڑھا آتا ہے رہوار اجل

ہر نفس ڈوبتی سانسوں کا بکھرتا ہوا ساز

زخم دیتے ہیں بہت نشتر تقدیر کے خم

درد دیتا ہے بہت حسن خمیدہ انداز

میری آنکھوں میں ہے بس طاق حرم کی قندیل

میرے سینے میں فقط برق تمنائے حجاز

ایک کوتاہ نظر بندۂ ناداں بزمیؔ

رب کونین اسے نور بصیرت سے نواز