sigha-e-raaz mein hai maqsad-e-taKHliq ka raaz

sīġha-e-rāz meñ hai maqsad-e-taḳhlīq kā raaz

lā-makāñ tak hai kahāñ murġh-e-ḳhirad kī parvāz

be-surūrī haiñ asīrān-e-sharī.at ke sujūd

be-huzūrī hai ġhulāmān-e-tarīqat kī namāz

us kī āñkhoñ meñ ba-juz harf-e-duā kuchh bhī nahīñ

jis ko qudrat ne atā kī thī nigāh-e-shahbāz

ruuh kī samt baḌhā aatā hai rahvār-e-ajal

har nafas Dūbtī sāñsoñ kā bikhartā huā saaz

zaḳhm dete haiñ bahut nishtar-e-taqdīr ke ḳham

dard detā hai bahut husn-e-ḳhamīda-andāz

merī āñkhoñ meñ hai bas tāq-e-haram kī qindīl

mere siine meñ faqat barq-e-tamannā-e-hijāz

ek kotāh-nazar banda-e-nādāñ 'bazmī'

rabb-e-kaunain ise nūr-e-basīrat se navāz

sigha-e-raaz mein hai maqsad-e-taKHliq ka raaz

la-makan tak hai kahan murgh-e-KHirad ki parwaz

be-sururi hain asiran-e-shariat ke sujud

be-huzuri hai ghulaman-e-tariqat ki namaz

us ki aankhon mein ba-juz harf-e-dua kuchh bhi nahin

jis ko qudrat ne ata ki thi nigah-e-shahbaz

ruh ki samt baDha aata hai rahwar-e-ajal

har nafas Dubti sanson ka bikharta hua saz

zaKHm dete hain bahut nishtar-e-taqdir ke KHam

dard deta hai bahut husn-e-KHamida-andaz

meri aankhon mein hai bas taq-e-haram ki qindil

mere sine mein faqat barq-e-tamanna-e-hijaz

ek kotah-nazar banda-e-nadan 'bazmi'

rabb-e-kaunain ise nur-e-basirat se nawaz