simab-washi tishna-labi ba-KHabari hai

sīmāb-vashī tishna-labī bā-ḳhabarī hai

is dasht meñ gar raḳht-e-safar hai to yahī hai

is shahr meñ ik āhū-e-ḳhush-chashm se ham ko

kam kam hī sahī nisbat-e-paimāna rahī hai

be-sohbat-e-ruḳhsār añdherā hī añdherā

go jaam vahī mai vahī mai-ḳhāna vahī hai

is ahd meñ bhī daulat-e-kaunain ke bā-vasf

har gaam pe un kī jo kamī thī so kamī hai

har dam tire anfās kī garmī kā gumāñ hai

har yaad tirī yaad ke phūloñ meñ basī hai

har shaam sajā.e haiñ tamannā ke nasheman

har sub.h mai-e-talḳhī-e-ayyām bhī pī hai

dhaḌkā hai dil-e-zār tire zikr se pahle

jab bhī kisī mahfil meñ tirī baat chalī hai

vo itr tirī kākul-e-shab-rañg ne chhiḌkā

mahkī hai ḳhirad ruuh kalī ban ke khilī hai

simab-washi tishna-labi ba-KHabari hai

is dasht mein gar raKHt-e-safar hai to yahi hai

is shahr mein ek aahu-e-KHush-chashm se hum ko

kam kam hi sahi nisbat-e-paimana rahi hai

be-sohbat-e-ruKHsar andhera hi andhera

go jam wahi mai wahi mai-KHana wahi hai

is ahd mein bhi daulat-e-kaunain ke ba-wasf

har gam pe un ki jo kami thi so kami hai

har dam tere anfas ki garmi ka guman hai

har yaad teri yaad ke phulon mein basi hai

har sham sajae hain tamanna ke nasheman

har subh mai-e-talKHi-e-ayyam bhi pi hai

dhaDka hai dil-e-zar tere zikr se pahle

jab bhi kisi mahfil mein teri baat chali hai

wo itr teri kakul-e-shab-rang ne chhiDka

mahki hai KHirad ruh kali ban ke khili hai