simin-badan hai wo na gul-e-nastaran hai wo

sīmīñ-badan hai vo na gul-e-nastaran hai vo

phir bhī hamāre vāste jān-e-suḳhan hai vo

jaadū ḳhayāl-āfrīñ dil-dār-o-dil-nashīñ

guldasta-e-bahār hai sarv-o-saman hai vo

mausam se māvarā hai mirā paikar-e-ḳhayāl

jis haal meñ ho apne liye ik chaman hai vo

raushan rakhā hai mujh ko usī ke ḳhayāl ne

tārīkiyoñ ke dasht meñ larzāñ kiran hai vo

chashm-e-ġhazal se dekhā to mahsūs ye huā

sarmāya-e-hayāt kī mīThī chubhan hai vo

pāmāl ho ke bhī maiñ rahā sabza-e-bahār

hai sabzagī bisāt mirī aur hiran hai vo

ye saarī hijrateñ to bahut ḳhuub haiñ 'zafar'

dil ko jahāñ qarār mile bas vatan hai vo

simin-badan hai wo na gul-e-nastaran hai wo

phir bhi hamare waste jaan-e-suKHan hai wo

jadu KHayal-afrin dil-dar-o-dil-nashin

guldasta-e-bahaar hai sarw-o-saman hai wo

mausam se mawara hai mera paikar-e-KHayal

jis haal mein ho apne liye ek chaman hai wo

raushan rakha hai mujh ko usi ke KHayal ne

tarikiyon ke dasht mein larzan kiran hai wo

chashm-e-ghazal se dekha to mahsus ye hua

sarmaya-e-hayat ki miThi chubhan hai wo

pamal ho ke bhi main raha sabza-e-bahaar

hai sabzagi bisat meri aur hiran hai wo

ye sari hijraten to bahut KHub hain 'zafar'

dil ko jahan qarar mile bas watan hai wo