سینہ فگار چاک جگر کچھ نہ پوچھیے

سینہ فگار چاک جگر کچھ نہ پوچھیے

افتاد ہائے شام و سحر کچھ نہ پوچھیے

کیونکر ہوئی ہے زیست بسر کچھ نہ پوچھیے

کیونکر کٹے ہیں شام و سحر کچھ نہ پوچھیے

کٹنے کو یوں تو کٹ ہی گئی عمر غم مگر

کتنا طویل تھا یہ سفر کچھ نہ پوچھیے

پھر عالم خیال میں آئے وہ بے نقاب

کیوں آہ میں ہوا ہے اثر کچھ نہ پوچھیے

ہم کب سے جل رہے ہیں تمنا میں آپ کی

مثل چراغ راہ گزر کچھ نہ پوچھیے

ہوش و حواس کھو گئی وہ چشم اولیں

انجام جلوہ ہائے دگر کچھ نہ پوچھیے

صحن چمن میں آئی یہ کیسی بہار گل

کیوں نالہ زن ہیں برگ و شجر کچھ نہ پوچھیے

کیوں بڑھ کے لے لیے مرے منزل نے خود قدم

جب بھی کیا ہے عزم سفر کچھ نہ پوچھیے

نیرؔ کسی نے رخ سے جو الٹا ذرا نقاب

کیوں بجھ گیا چراغ سحر کچھ نہ پوچھیے