sina to DhunD liya muttasil apna humne

siina to DhūñD liyā muttasil apnā ham ne

nahīñ mālūm diyā kis ko dil apnā ham ne

ahd kyā kar ke tire dar se uThe the qismat

phir dikhāyā tujhe rū-e-ḳhajil apnā ham ne

merī ālūdgiyoñ se na kar ikrāh ai shaiḳh

kuchh banāyā to nahīñ āb-o-gil apnā ham ne

saḳht kāfir kā dil afsos na sharmāyā kabhī

puujā juuñ but to bahut sañg-dil apnā ham ne

paanī pahuñchā sake jab tak mirī chashm-e-namnāk

jal bujhā paayā dil-e-mushta.il apnā ham ne

baad sau ranjish-e-bejā ke na paayā ba-ġhalat

na pashīmān tujhe munfa.il apnā ham ne

dar ġharībī na thā kuchh aur mayassar 'hasrat'

ishq kī nazr kiyā diin o dil apnā ham ne

sina to DhunD liya muttasil apna hum ne

nahin malum diya kis ko dil apna hum ne

ahd kya kar ke tere dar se uThe the qismat

phir dikhaya tujhe ru-e-KHajil apna hum ne

meri aaludgiyon se na kar ikrah ai shaiKH

kuchh banaya to nahin aab-o-gil apna hum ne

saKHt kafir ka dil afsos na sharmaya kabhi

puja jun but to bahut sang-dil apna hum ne

pani pahuncha sake jab tak meri chashm-e-namnak

jal bujha paya dil-e-mushtail apna hum ne

baad sau ranjish-e-beja ke na paya ba-ghalat

na pashiman tujhe munfail apna hum ne

dar gharibi na tha kuchh aur mayassar 'hasrat'

ishq ki nazr kiya din o dil apna hum ne