سینے میں آفتاب نہیں ہے کسی کے پاس

سینے میں آفتاب نہیں ہے کسی کے پاس

ظلمت کا سد باب نہیں ہے کسی کے پاس

ہر آنکھ میں ہیں عشرت فانی کے خواب کیوں

کیا اور کوئی خواب نہیں ہے کسی کے پاس

دنیا سے اعتبار وفا اٹھ گیا ہے کیوں

اس بات کا جواب نہیں ہے کسی کے پاس

یا تو ہر ایک بت میں خدا کا جمال ہے

یا چشم انتخاب نہیں ہے کسی کے پاس

پڑھتا ہے کارل مارکس کا سرمایہ ہر کوئی

اللہ کی کتاب نہیں ہے کسی کے پاس

کب سے دعا کو ہاتھ اٹھائے ہوئے ہیں لوگ

اور حرف مستجاب نہیں ہے کسی کے پاس

کتنوں کو بے گناہی کی بیدلؔ سزا ملی

اس کا کوئی جواب نہیں ہے کسی کے پاس