sine mein aag aankh su-e-dar lagi rahe

siine meñ aag aañkh sū-e-dar lagī rahe

kaam intizār-e-yār meñ ai dil yahī rahe

pahlū ke saath chāk-e-jigar bhī zarūr hai

ḳhanjar ke saath ek qaraulī lagī rahe

dāvat mah-e-siyām kī lāzim hai zāhido

das biis roz mashġhala-e-mai-kashī rahe

ai tifl Dar hai chashm-e-bad-e-pīr-e-charḳh kā

haikal zarūr tere gale meñ paḌī rahe

so lutf-e-vasl uThā.eñge ik aur le ke niiñd

ehsān hai jo murġh-e-sahar chup abhī rahe

tiin āsmānoñ se nahīñ chhuptā hai āftāb

kab ik naqāb se tirī sūrat chhipī rahe

aao na mere ghar to na jaao kisī ke ghar

merī ḳhushī rahe na tumhārī ḳhushī rahe

sone ke vaqt ai gul-e-tar itr kyā zarūr

terī galī meñ raat ko champā-kalī rahe

hukm-e-sharāb de to duā duuñ ki ai faqīh

mastoñ ke haath se tirī izzat bachī rahe

ye ġharra-e- se vafūr-e-sharāb ho

ḳhālī ke ba.ad tak bhī tabī.at bharī rahe

ḳhālī na koī sher ho bandish ke nuur se

ai 'mehr' ālam-e-ġhazal-e-'anvarī' rahe

sine mein aag aankh su-e-dar lagi rahe

kaam intizar-e-yar mein ai dil yahi rahe

pahlu ke sath chaak-e-jigar bhi zarur hai

KHanjar ke sath ek qarauli lagi rahe

dawat mah-e-siyam ki lazim hai zahido

das bis roz mashghala-e-mai-kashi rahe

ai tifl Dar hai chashm-e-bad-e-pir-e-charKH ka

haikal zarur tere gale mein paDi rahe

so lutf-e-wasl uThaenge ek aur le ke nind

ehsan hai jo murgh-e-sahar chup abhi rahe

tin aasmanon se nahin chhupta hai aaftab

kab ek naqab se teri surat chhipi rahe

aao na mere ghar to na jao kisi ke ghar

meri KHushi rahe na tumhaari KHushi rahe

sone ke waqt ai gul-e-tar itr kya zarur

teri gali mein raat ko champa-kali rahe

hukm-e-sharab de to dua dun ki ai faqih

maston ke hath se teri izzat bachi rahe

ye gharra-e- se wafur-e-sharab ho

KHali ke baad tak bhi tabiat bhari rahe

KHali na koi sher ho bandish ke nur se

ai 'mehr' aalam-e-ghazal-e-'anwari' rahe