sine mein arman ki ganga aankhon mein jamuna ka hai jal

siine meñ armān kī gangā āñkhoñ meñ jamunā kā hai jal

lekin dil ke tāj-mahal meñ koī nahīñ mumtāz mahal

kis ko batlā.eñ ki kyā hai jazb-e-darūñ ehsās-e-vafā

kis ke ġham meñ naġhma-e-dil hai kis kī hai tasvīr ġhazal

aa.heñ aañsū girya-o-hasrat soz-e-darūñ hangāma-e-vahshat

in sho'loñ meñ jo na tapā ho kyā jaane vo dard-e-baġhal

maiḳhāne meñ jaam badal de chāhe mai-e-gulfām badal de

kam-az-kam ai pīr-e-muġhāñ tū rasm-e-ravādārī na badal

kyā samjhe vo nashsha-e-mai ko kyā jaane zunnār qadah ko

tū hī dard-āshām ko saaqī batlā de tahdīd-e-'amal

ruḳh kī dhuup ā.īna-e-tābāñ mār-gazīda kākul-e-pechāñ

dilkash ruup aur chāh-e-zanaḳhdāñ sab haiñ 'sahar' sāmān-e-ajal

sine mein arman ki ganga aankhon mein jamuna ka hai jal

lekin dil ke taj-mahal mein koi nahin mumtaz mahal

kis ko batlaen ki kya hai jazb-e-darun ehsas-e-wafa

kis ke gham mein naghma-e-dil hai kis ki hai taswir ghazal

aahen aansu girya-o-hasrat soz-e-darun hangama-e-wahshat

in sho'lon mein jo na tapa ho kya jaane wo dard-e-baghal

maiKHane mein jam badal de chahe mai-e-gulfam badal de

kam-az-kam ai pir-e-mughan tu rasm-e-rawadari na badal

kya samjhe wo nashsha-e-mai ko kya jaane zunnar qadah ko

tu hi dard-asham ko saqi batla de tahdid-e-'amal

ruKH ki dhup aaina-e-taban mar-gazida kakul-e-pechan

dilkash rup aur chah-e-zanaKHdan sab hain 'sahar' saman-e-ajal