sine mein kasak ban ke utarne ke liye hai

siine meñ kasak ban ke utarne ke liye hai

har lamha-e-hāsil ki guzarne ke liye hai

sañvaregā na is shaam sar-e-ā.īna koī

ye shaam to tere hī sañvarne ke liye hai

nāmūs-e-gulistāñ kā taqāzā sahī kuchh bhī

ḳhushbū to magar qaid na karne ke liye hai

tum ret meñ chāho to use khe na sakoge

kashtī jo samundar meñ utarne ke liye hai

kuchh aur nahīñ dil kī tamannāoñ kā hāsil

is shāḳh kā har phuul bikharne ke liye hai

soī huī har Tiis kabhī jaag uThegī

jo zaḳhm hai is dil meñ na bharne ke liye hai

tasvīr-e-ġham-e-dil na kabhī maand paḌegī

miTtā huā har naqsh ubharne ke liye hai

ye qāfila-e-umr-e-ravāñ rāh-e-talab par

do-chār qadam chal ke Thaharne ke liye hai

'maḳhmūr' ye duniyā vo rasad-gāh-e-ajal hai

zinda hai yahāñ koī to marne ke liye hai

sine mein kasak ban ke utarne ke liye hai

har lamha-e-hasil ki guzarne ke liye hai

sanwarega na is sham sar-e-aina koi

ye sham to tere hi sanwarne ke liye hai

namus-e-gulistan ka taqaza sahi kuchh bhi

KHushbu to magar qaid na karne ke liye hai

tum ret mein chaho to use khe na sakoge

kashti jo samundar mein utarne ke liye hai

kuchh aur nahin dil ki tamannaon ka hasil

is shaKH ka har phul bikharne ke liye hai

soi hui har Tis kabhi jag uThegi

jo zaKHm hai is dil mein na bharne ke liye hai

taswir-e-gham-e-dil na kabhi mand paDegi

miTta hua har naqsh ubharne ke liye hai

ye qafila-e-umr-e-rawan rah-e-talab par

do-chaar qadam chal ke Thaharne ke liye hai

'maKHmur' ye duniya wo rasad-gah-e-ajal hai

zinda hai yahan koi to marne ke liye hai