sine mein KHizan aankhon mein barsat rahi hai

siine meñ ḳhizāñ āñkhoñ meñ barsāt rahī hai

is ishq meñ har fasl kī sauġhāt rahī hai

kis tarah ḳhud apne ko yaqīñ aa.e ki us se

ham ḳhāk-nashīnoñ kī mulāqāt rahī hai

suufī kā ḳhudā aur thā shā.er kā ḳhudā aur

tum saath rahe ho to karāmāt rahī hai

itnā to samajh roz ke baḌhte hue fitne

ham kuchh nahīñ bole to tirī baat rahī hai

ham meñ to ye hairāni-o-shorīdgi-e-ishq

bachpan hī se minjumla-e-ādāt rahī hai

is se bhī to kuchh rabt jhalaktā hai ki vo aañkh

bas ham pe ināyāt meñ mohtāt rahī hai

ilzām kise deñ ki tire pyaar meñ ham par

jo kuchh bhī rahī hasb-e-rivāyāt rahī hai

kuchh 'mīr' ke hālāt se hāsil karo ibrat

le de ke ab ik izzat-e-sādāt rahī hai

sine mein KHizan aankhon mein barsat rahi hai

is ishq mein har fasl ki saughat rahi hai

kis tarah KHud apne ko yaqin aae ki us se

hum KHak-nashinon ki mulaqat rahi hai

sufi ka KHuda aur tha shaer ka KHuda aur

tum sath rahe ho to karamat rahi hai

itna to samajh roz ke baDhte hue fitne

hum kuchh nahin bole to teri baat rahi hai

hum mein to ye hairani-o-shoridgi-e-ishq

bachpan hi se minjumla-e-adat rahi hai

is se bhi to kuchh rabt jhalakta hai ki wo aankh

bas hum pe inayat mein mohtat rahi hai

ilzam kise den ki tere pyar mein hum par

jo kuchh bhi rahi hasb-e-riwayat rahi hai

kuchh 'mir' ke haalat se hasil karo ibrat

le de ke ab ek izzat-e-sadat rahi hai