sine mein mere bojh bhi aur dahka chaman bhi

siine meñ mire bojh bhī aur dahkā chaman bhī

kyā chiiz tirī yaad hai ḳhushbū bhī ghuTan bhī

pahle to tamannā thī tirī sirf magar ab

āñkhoñ meñ nazar aane lagī merī thakan bhī

hai ishq safar dil se faqat dil kā magar kyuuñ

is raah meñ aate haiñ bayābāñ bhī chaman bhī

jo dil pe guzartī haiñ raqam kar use dil par

zaḳhmoñ kī numā.ish na bane bazm-e-suḳhan bhī

taptī huī dhartī ko mire chhāloñ ne sīñchā

kuchh kaam to aayā hai chalo bāvlā-pan bhī

hairat hai, mujhe saañs vahīñ aatī hai jānāñ

ghuT jaanā sikhā.e jahāñ yādoñ kī pavan bhī

kumhlāyā zarā rañg to vo soch meñ Duube

aahoñ se milā kartā hai kuchh sāñvalā-pan bhī

pairoñ ke tale se kahīñ miTTī na khisak jaa.e

zid hai mirī muTThī meñ ho dhartī bhī gagan bhī

mahbūb ke chehre ke muqābil bhī rahā par

is daur meñ aayā to huā chāñd mission bhī

'navnīt' tū hai fazl kī ūñchā.ī kā hissa

rakh dil meñ agar nuur to rakh zehn meñ fan bhī

sine mein mere bojh bhi aur dahka chaman bhi

kya chiz teri yaad hai KHushbu bhi ghuTan bhi

pahle to tamanna thi teri sirf magar ab

aankhon mein nazar aane lagi meri thakan bhi

hai ishq safar dil se faqat dil ka magar kyun

is rah mein aate hain bayaban bhi chaman bhi

jo dil pe guzarti hain raqam kar use dil par

zaKHmon ki numaish na bane bazm-e-suKHan bhi

tapti hui dharti ko mere chhaalon ne sincha

kuchh kaam to aaya hai chalo bawla-pan bhi

hairat hai, mujhe sans wahin aati hai jaanan

ghuT jaana sikhae jahan yaadon ki pawan bhi

kumhlaya zara rang to wo soch mein Dube

aahon se mila karta hai kuchh sanwala-pan bhi

pairon ke tale se kahin miTTi na khisak jae

zid hai meri muTThi mein ho dharti bhi gagan bhi

mahbub ke chehre ke muqabil bhi raha par

is daur mein aaya to hua chand mission bhi

'nawnit' tu hai fazl ki unchai ka hissa

rakh dil mein agar nur to rakh zehn mein fan bhi