سینے میں طوفان ہے بھائی

سینے میں طوفان ہے بھائی

ہونٹوں پہ مسکان ہے بھائی

اندر کچھ ہے باہر کچھ ہے

یہ کیسا انسان ہے بھائی

دل کے اندر کفر بھرا ہے

ہاتھوں میں قرآن ہے بھائی

بول تری اوقات بتا دوں

پیش نظر دیوان ہے بھائی

قابو میں دل آج نہیں ہے

بارش کا امکان ہے بھائی

کتنے آئینے توڑے گا

بے چہرہ حیران ہے بھائی

ایک غلط انسان کی خاطر

بستی میں ہیجان ہے بھائی

میخانے آباد ہیں ہر سو

اور مسجد ویران ہے بھائی

کتنی یادیں دفن ہیں اس میں

دل بھی قبرستان ہے بھائی

شیطانوں کو چھوٹ ملی ہے

مشکل میں انسان ہے بھائی

شمع ضمیرؔ اک بھی نہیں روشن

خانۂ دل ویران ہے بھائی