sine pe ayan naqsh-e-kuhan hai ki nahin hai

siine pe 'ayāñ naqsh-e-kuhan hai ki nahīñ hai

kyā koī yahāñ vāris-e-fan hai ki nahīñ hai

kal aañkh meñ ḳhvāboñ kā nasha thā ki nahīñ thā

ab TūTtī kirchoñ kī chubhan hai ki nahīñ hai

chhūte hī ḳhalāoñ meñ bikhar jaatā hai yaaro

maiñ kaise batā.ūñ vo badan hai ki nahīñ hai

kyā dekhnā paañv kā ġharīb-ul-vatanī meñ

ghar jā ke batā.eñge thakan hai ki nahīñ hai

sun lahja-e-ḳhāmosh kā andāz-e-taḳhātub

aur bol ki ye rashk-e-suḳhan hai ki nahīñ hai

duniyā tire pahlū meñ qazā aa ga.ī ham ko

tū pūchh rahī hai ki ghuTan hai ki nahīñ hai

ye baat batāo to maiñ āvāz lagā.ūñ

yaañ lauT ke aane kā chalan hai ki nahīñ hai

sine pe 'ayan naqsh-e-kuhan hai ki nahin hai

kya koi yahan waris-e-fan hai ki nahin hai

kal aankh mein KHwabon ka nasha tha ki nahin tha

ab TuTti kirchon ki chubhan hai ki nahin hai

chhute hi KHalaon mein bikhar jata hai yaro

main kaise bataun wo badan hai ki nahin hai

kya dekhna panw ka gharib-ul-watani mein

ghar ja ke bataenge thakan hai ki nahin hai

sun lahja-e-KHamosh ka andaz-e-taKHatub

aur bol ki ye rashk-e-suKHan hai ki nahin hai

duniya tere pahlu mein qaza aa gai hum ko

tu puchh rahi hai ki ghuTan hai ki nahin hai

ye baat batao to main aawaz lagaun

yan lauT ke aane ka chalan hai ki nahin hai