سینے پہ ہاتھ رکھے تھا اور رنگ زرد تھا

سینے پہ ہاتھ رکھے تھا اور رنگ زرد تھا

کل شب کو کیا شفیقؔ ترے دل میں درد تھا

فرقت میں پوچھتے ہو مرا رنگ زرد تھا

کچھ دل پہ منحصر نہیں رگ رگ میں درد تھا

ان سے کہوں گا دل کو مرے آپ دیکھ لیں

ہے جس جگہ نشان یہاں پہلے درد تھا

تڑپا تو تھوڑا مل گئی لذت بہت مجھے

کل شب کو میٹھا میٹھا مرے دل میں درد تھا

جا کر لحد میں چین سے سویا میں حشر تک

تکلیف مرگ سے مری رگ رگ میں درد تھا

اب شب کا لوٹنا نہ تڑپنا نہ آہ سرد

اس دل کو موت آ گئی جس دل میں درد تھا

ناوک فگن کے صدقہ میں ایذا سے بچ گئے

اس جا پہ تیر مارا جہاں دل میں درد تھا

مر کر شفیقؔ ہجر کی ایذا یوں ہی رہی

محشر میں میں اٹھا مرے پہلو میں درد تھا