sine se lagaen tumhein arman yahi hai

siine se lagā.eñ tumheñ armān yahī hai

jiine kā maza hai to mirī jaan yahī hai

sabr is liye achchhā hai ki ā.inda hai ummīd

maut is liye behtar hai ki āsān yahī hai

tū dil meñ to aatā hai samajh meñ nahīñ aatā

bas jaan gayā maiñ tirī pahchān yahī hai

gesū ke sharīk aur bhī the qatl meñ mere

kyā vaj.h hai is kī ki pareshān yahī hai

us but ne kahā bosa-e-be-izn pa hañs kar

bas dekh liyā aap kā īmān yahī hai

karte haiñ ba-tadrīj vo zulmoñ meñ izāfa

mujh par agar un kā hai kuchh ehsān yahī hai

ham falsafe ko kahte haiñ gumrāhī kā baa.is

vo peT dikhāte haiñ ki shaitān yahī hai

sine se lagaen tumhein arman yahi hai

jine ka maza hai to meri jaan yahi hai

sabr is liye achchha hai ki aainda hai ummid

maut is liye behtar hai ki aasan yahi hai

tu dil mein to aata hai samajh mein nahin aata

bas jaan gaya main teri pahchan yahi hai

gesu ke sharik aur bhi the qatl mein mere

kya wajh hai is ki ki pareshan yahi hai

us but ne kaha bosa-e-be-izn pa hans kar

bas dekh liya aap ka iman yahi hai

karte hain ba-tadrij wo zulmon mein izafa

mujh par agar un ka hai kuchh ehsan yahi hai

hum falsafe ko kahte hain gumrahi ka bais

wo peT dikhate hain ki shaitan yahi hai