sip muTThi mein hai aafaq bhi ho sakta hai

siip muTThī meñ hai āfāq bhī ho saktā hai

aur agar chāhūñ to ye ḳhaak bhī ho saktā hai

ye jo ma.asūm sā Dar hai kisī bachche jaisā

aise hālāt meñ saffāk bhī ho saktā hai

aao us tīsre nukte pe bhī kuchh ġhaur kareñ

ham jise juft kaheñ taaq bhī ho saktā hai

vajd meñ raqs to be-ḳhauf kiyā jaatā hai

ho agar ishq to bebāk bhī ho saktā hai

hijr nāsūr hai chup-chāp hī jhelo is ko

āh-o-zārī se ḳhatarnāk bhī ho saktā hai

ye jo sarsabz sā lagtā hai umīdoñ kā shajar

rut badalne pe ye ḳhāshāk bhī ho saktā hai

to abhī bhej de us paar se rahmat koī

maiñ ye suntī huuñ karam Daak bhī ho saktā hai

vo jo kosoñ tujhe phailā huā aatā hai nazar

vo samundar mirī poshāk bhī ho saktā hai

ye siyāh-baḳht use DhūñDne lag jaa.eñ agar

un ko phir nuur kā idrāk bhī ho saktā hai

maiñ jo miTTī se ḳhudā aur banānā chāhūñ

āsmāñ mere liye chaak bhī ho saktā hai

kyuuñ nā 'injīl' dobāra se utārī jaa.e

koī īsā.ī kī tarah paak bhī ho saktā hai

sip muTThi mein hai aafaq bhi ho sakta hai

aur agar chahun to ye KHak bhi ho sakta hai

ye jo masum sa Dar hai kisi bachche jaisa

aise haalat mein saffak bhi ho sakta hai

aao us tisre nukte pe bhi kuchh ghaur karen

hum jise juft kahen taq bhi ho sakta hai

wajd mein raqs to be-KHauf kiya jata hai

ho agar ishq to bebak bhi ho sakta hai

hijr nasur hai chup-chap hi jhelo is ko

aah-o-zari se KHatarnak bhi ho sakta hai

ye jo sarsabz sa lagta hai umidon ka shajar

rut badalne pe ye KHashak bhi ho sakta hai

to abhi bhej de us par se rahmat koi

main ye sunti hun karam Dak bhi ho sakta hai

wo jo koson tujhe phaila hua aata hai nazar

wo samundar meri poshak bhi ho sakta hai

ye siyah-baKHt use DhunDne lag jaen agar

un ko phir nur ka idrak bhi ho sakta hai

main jo miTTi se KHuda aur banana chahun

aasman mere liye chaak bhi ho sakta hai

kyun na 'injil' dobara se utari jae

koi isai ki tarah pak bhi ho sakta hai