simaT raha hai wafa ka aanchal hisar-e-wahshat machal raha hai

simaT rahā hai vafā kā āñchal hisār-e-vahshat machal rahā hai

ajiib an-honiyoñ ke Dar se hamārā siinā dahal rahā hai

ye dasht kāñToñ se phal rahā hai ye kaisā parvat uchhal rahā hai

zamīñ ki bārūd ho chukī hai falak ki sho.ala ugal rahā hai

ye mere apne ye mere shā.ir jo rafta rafta guzar rahe haiñ

ḳhudā kī āñkheñ michī huī haiñ nadī kā paanī ubal rahā hai

ye daur-e-hāzir kī be-hisī hai yā ik bagule kī shakl koī

jo mere chashme kī machhliyoñ ko ik ek kar ke nigal rahā hai

maiñ gāhe-gāhe qazā se aage qadam baḌhā.e guzar rahā huuñ

ki chūhā billī se tez-rau meñ ḳhudī se aage nikal rahā hai

vo jaise rañg-e-gulāl bhī ho vo jaise bāb-e-visāl bhī ho

vo ya.anī shā.ir kā ḳhvāb hai jo hamāre siine meñ pal rahā hai

simaT raha hai wafa ka aanchal hisar-e-wahshat machal raha hai

ajib an-honiyon ke Dar se hamara sina dahal raha hai

ye dasht kanTon se phal raha hai ye kaisa parwat uchhal raha hai

zamin ki barud ho chuki hai falak ki shoala ugal raha hai

ye mere apne ye mere shair jo rafta rafta guzar rahe hain

KHuda ki aankhen michi hui hain nadi ka pani ubal raha hai

ye daur-e-hazir ki be-hisi hai ya ek bagule ki shakl koi

jo mere chashme ki machhliyon ko ek ek kar ke nigal raha hai

main gahe-gahe qaza se aage qadam baDhae guzar raha hun

ki chuha billi se tez-rau mein KHudi se aage nikal raha hai

wo jaise rang-e-gulal bhi ho wo jaise bab-e-visal bhi ho

wo yani shair ka KHwab hai jo hamare sine mein pal raha hai