simTa to main zarra hun bikhra to main sahra hun

simTā to maiñ zarra huuñ bikhrā to maiñ sahrā huuñ

tham jā.ūñ to qatra huuñ bah jā.ūñ to dariyā huuñ

kyoñ tuur pe maiñ jā.ūñ kyoñ arsh pe maiñ jā.ūñ

us kā hī to partav huuñ maiñ us ke sivā kyā huuñ

kyā koī sharīk-e-ġham hogā mirā duniyā meñ

vo arsh pe tanhā hai maiñ farsh pe tanhā huuñ

sūraj se shuā.eñ kab hotī haiñ judā us se

vo nuur kā mamba.a hai maiñ nuur kā dariyā huuñ

samjhūñ to agar ḳhud ko ban jā.ūñ mah-e-kāmil

maanā ki falak se maiñ TuuTā huā taarā huuñ

kyā koī mujhe samjhe kyā koī mujhe jaane

bikhrā huā jalva huuñ simTā huā pardā huuñ

kyoñ mujh ko chaḌhāte haiñ vo daar pe ‘rūmānī’

maiñ ḳhaak ke parde meñ us kā hī to jalva huuñ

simTa to main zarra hun bikhra to main sahra hun

tham jaun to qatra hun bah jaun to dariya hun

kyon tur pe main jaun kyon arsh pe main jaun

us ka hi to partaw hun main us ke siwa kya hun

kya koi sharik-e-gham hoga mera duniya mein

wo arsh pe tanha hai main farsh pe tanha hun

suraj se shuaen kab hoti hain juda us se

wo nur ka mamba hai main nur ka dariya hun

samjhun to agar KHud ko ban jaun mah-e-kaamil

mana ki falak se main TuTa hua tara hun

kya koi mujhe samjhe kya koi mujhe jaane

bikhra hua jalwa hun simTa hua parda hun

kyon mujh ko chaDhate hain wo dar pe ‘rumani’

main KHak ke parde mein us ka hi to jalwa hun