simTi hui ye ghaDiyan phir se na bikhar jaen

simTī huī ye ghaḌiyāñ phir se na bikhar jaa.eñ

is raat meñ jī le ham is raat meñ mar jaa.eñ

ab sub.h na aa paa.e aao ye duā māñgeñ

is raat ke har pal se rāteñ hī ubhar jaa.eñ

duniyā kī nigāheñ ab ham tak na pahuñch paa.eñ

tāroñ meñ baseñ chal kar dhartī meñ utar jaa.eñ

hālāt ke tīroñ se chhalnī haiñ badan apne

paas aao ki sīnoñ ke kuchh zaḳhm to bhar jaa.eñ

aage bhī añdherā hai pīchhe bhī añdherā hai

apnī haiñ vahī sāñseñ jo saath guzar jaa.eñ

bichhḌī huī rūhoñ kā ye mail suhāna hai

is mail kā kuchh ehsāñ jismoñ pe bhī kar jaa.eñ

tarse hue jazboñ ko ab aur na tarsāo

tum shāne pe sar rakh do ham bāhoñ meñ bhar jaa.eñ

simTi hui ye ghaDiyan phir se na bikhar jaen

is raat mein ji le hum is raat mein mar jaen

ab subh na aa pae aao ye dua mangen

is raat ke har pal se raaten hi ubhar jaen

duniya ki nigahen ab hum tak na pahunch paen

taron mein basen chal kar dharti mein utar jaen

haalat ke tiron se chhalni hain badan apne

pas aao ki sinon ke kuchh zaKHm to bhar jaen

aage bhi andhera hai pichhe bhi andhera hai

apni hain wahi sansen jo sath guzar jaen

bichhDi hui ruhon ka ye mail suhana hai

is mail ka kuchh ehsan jismon pe bhi kar jaen

tarse hue jazbon ko ab aur na tarsao

tum shane pe sar rakh do hum bahon mein bhar jaen