simTun kahan se sath pe dariya rawan nahin

simTūñ kahāñ se sat.h pe dariyā ravāñ nahīñ

uThtā kahāñ se mauj meñ tāb-o-tavāñ nahīñ

thamtā nafas nafas ke ishāre qadam qadam

dauḌūñ maiñ kaise paañv meñ reg-e-ravāñ nahīñ

pursān-e-shab sitāre nahīñ haiñ sar-e-falak

shorīda-sar ḳhalāoñ bharā āsmāñ nahīñ

ik ranj-e-be-kanār tamavvuj-talab kahāñ

ik lutf-e-be-bahā sar-e-dāman girāñ nahīñ

kyā kahiye lams-hā-e-ḳharābī kā intishār

nazroñ meñ ab zamīn nahīñ āsmāñ nahīñ

'ālam pe laḳht laḳht paḌe raushnī kā bojh

āvāra-pā bhī shākī-e-zulmat-fashāñ nahīñ

phir dasht-e-lā-makāñ meñ sadā-e-jaras kahāñ

phir musht-e-ḳhāk lā.eq-e-sad-imtihāñ nahīñ

simTun kahan se sath pe dariya rawan nahin

uThta kahan se mauj mein tab-o-tawan nahin

thamta nafas nafas ke ishaare qadam qadam

dauDun main kaise panw mein reg-e-rawan nahin

pursan-e-shab sitare nahin hain sar-e-falak

shorida-sar KHalaon bhara aasman nahin

ek ranj-e-be-kanar tamawwuj-talab kahan

ek lutf-e-be-baha sar-e-daman giran nahin

kya kahiye lams-ha-e-KHarabi ka intishaar

nazron mein ab zamin nahin aasman nahin

'alam pe laKHt laKHt paDe raushni ka bojh

aawara-pa bhi shaki-e-zulmat-fashan nahin

phir dasht-e-la-makan mein sada-e-jaras kahan

phir musht-e-KHak laeq-e-sad-imtihan nahin